Te tū hei kairīwhi whenua Māori
Te tono tauatanga
Ka rite ana te whānau ki te tono mō te tauatanga o te whenua, whakapā atu ki ngā kaimahi o te Kōti Whenua Māori — mā rātou koe e āwhina ki te whakarite i tō tono.
Inā rite ana koe ki te tīmata i tō pukatono tauatanga, whakaemihia ngā kōrero katoa kua kimihia e koe mō tō mema whānau i mate me ngā tāngata katoa ki ō whakaaro ka whai pānga atu ki te taua atu. He mea pai kia mau ki a koe ēnei kōrero inā tīmata ana koe ki te whakakī i te pukatono.
E taea ana e koe te pukatono mō te tauatanga te tiki:
- i tō tari ā-rohe o te Kōti Whenua Māori (MLC)
- i te pae tukutuku o te Kōti Whenua Māori (MLC)
- mā te waea atu ki te Kōti me te tono atu kia tukua ki te mēra, ki te imēra rānei te pukatono e pīrangi ana.
Ko ngā tari ā-rohe o ngā Kōti Whenua Māori
He puka mō tēnā kaupapa, mō tēnā kaupapa – hei tauira, mehemea i waihotia, kāore rānei tētahi wīra e tō māmā, e tō kuia rānei. Kei tā mātou utauta rapu puka e āwhina koe ki te whiriwhiri ko tēhea te mea tika māu.
Which form should I use?
Ko te whakakī i te puka
I ngā pukatono he nui ngā taipitopito e pīrangitia ana – engari he hirahira te katoa. I runga i ō mōhiohio ka āhei te Kōti Whenua Māori ki:
- te rapu i ngā kōrero a ngā whenua herekore Māori, kaporeihana Māori rānei i whai pānga atu te mema whānau i mate, ā
- te whiriwhiri tika i ngā mauhanga i a rātou e rangahau ana i tō pukatono tauatanga.
I roto i te pukatono ka tonoa koe:
- mō ngā ingoa katoa o te hunga e tono ana ki te taua atu
- mō ētahi taipitopito mō te mema whānau i mate me tō whanaungatanga ki a ia
- mō tō whakapapa ake.
Ka tonoa hoki koe kia horahia ētahi pukapuka tautoko ki te taha o tō pukatono – he rārangi mōhiohio i te pito whakamutunga o tēnā pukatono, o tēnā pukatono e kīia ana he aha ēnei momo kōrero. Ka tonoa koe kia tāpiri:
- he kape o te tiwhikete mate o tō mema whānau (te mea tūturu, kape rānei)
- he kape o tāna wīra, mehemea he wīra tāna (te mea tūturu, kape whai mana rānei)
- he taipitopito o te whakapūmau mehemea kua whakapūmautia
- he reta whakahaere kua whakapūmautia
- he tiwhikete whāngai mō ngā tamariki i whāngaitia ā-ture ki roto i te whānau.
Mehemea ka hoatu tō pukatono ki tētahi tari Kōti Whenua Māori, mā te kaimahi ngā pukapuka e whakakape me te whakahoki atu ki a koe. Mehemea ka tono mā te mēra, e āhei ana koe ki te tono kia whakahokia atu ō pukapuka i te rangi tonu o te rongonga tauatanga.
-
Ko ngā pukapuka whai mana
I te korenga ōu e pai ana ki te tuku i te kape tūturu o tētahi pukapuka ki te Kōti Whenua Māori i te taha o tō pukatono, e āhei ana koe ki te hoatu i tētahi pukapuka e whai mana ana.
Ko te pukapuka whai mana, he whakaaetanga nā tētahi tangata kua whakamanatia e te ture – pērā i te Mana Whakaaio – ki te pane, ki te waitohu rānei he ōrite ki te kape tūturu. I Aotearoa nei, e taea ana e ēnei tāngata tō pukapuka te whakapūmau:
- he Mana Whakaaio (JP)
- he roia
- he kaiwawao
- he āpiha kōti
- he reanga āpiha pirihimana e tika ana rānei.
Kāore he utu ki te tūtaki i te JP ki Aotearoa. E taea ana e koe te JP te tono kia hui ki tō rātou kāinga, ka tono rānei ki tō whare pukapuka ā -rohe, ki Ngā Pou Whakawhirinaki o Aotearoa rānei mehemea he wāhi ki reira ki te hui.
Kimihia tētahi Mana Whakaaio e noho tata ana ki a koe
Mehemea kāore i a koe te kape tūturu o te pukapuka – mehemea he kape anake tāu – māu e waitohu tētahi puka ā-ture e mea ana, e ōrite ana tō kape i te kape tūturu. Ka tonoa koe e te Mana Whakaaio kia waitohungia te puka i te wā e hui ana kōrua.
-
Ko te whakapūmau me ngā reta whakahaere
I mua i te matenga o tētahi tangata, ka whakatauhia e ia kia tuhi wīra e tohutohu ana i ōna hiahia mō onā whare, rawa rānei i muri i tōna matenga. Ka mate ia, ka karangatia ōna whare, rawa hoki ki tōna “rawa”.
I roto i te wīra ka whakaingoatia mā wai te rawa e whakahaere – ka kīia rātou ko te “kaiwhakaoti” o te wīra. Tērā pea me tono ia ki te Kōti Teitei ki te hāpono atu kei a ia te mana ki te whakahaere i te rawa. E karangatia ana ko te “whakapūmautanga”, ko te “whakapūmau wīra” rānei.
Ki te mate atu te tangata, ā, kāore i waiho wīra, me tono atu pea koe ki te Kōti Teitei mō ngā “reta whakahaere” (kaua kē ko te whakapūmautanga). Mehemea kāore koe i te tino mōhio, kōrero atu ki ngā kaimahi ki te Kōti Whenua Māori.
